網頁

20070730

皇后碼頭

我真係好討厭啲高官扮晒「前社運人士」,真係好討厭!講真,林鄭唔係第一個,但係因為之前果啲事件涉及學生,今次天星/皇后呢場運動,其實真係有好多不同階層、年齡、職業既人參與,佢出呢招「細路仔唔識世界」,真係零捨討厭!

其實呢啲「我以前都參加學生/社會運動,我都明白學生/青少年係應該要有激情,但係‥‥‥」論述,其實不外乎暗示:

1. 要講老資格,佢比你老資格(或曰老屎忽);
2. 細路,遲啲你就會明白你今日做既事係傻豬,金錢係大於一切架,唔好咁傻啦;
3. 你個人激進囉(你知啦,「激進」響資本主義社會係死罪黎架嘛);
4. 由屎忽決定把口,同埋決定個腦,係必然定律,點解你地呢啲細路仔唔明。
5. 唔使聽你講野囉,因為你細路仔,扭下計,都係青春期反叛荷爾蒙發作,有事無事都反對下,換句話講,都係鳩蹹姐。

成十年啦,我聽到呢啲論述,都仲係忍唔住要講粗口,其實我已經有資格可以做老屎忽,可以想下當年,但係我真係覺得,如果我有一日變成咁,真係一件好悲哀既事。

可唔可以唔好一句「年青人有激情」,抹殺晒人地用左大半年,做好晒plan,比晒反建議,有策略,有目標,有討論,有宣傳,有教育,有遊說等等既工作?呢啲野唔係一句「年青人有激情」可以hea 過去架!







沒有留言: